律師手記 : 惡人先告狀

Lawyer's Journal 17.10.01
20171001

香港法院每年有過萬宗民事訴訟立案,案件各有不同形形色色。有合同糾紛,股東爭拗,建築工程合約糾紛,侵權案件,土地糾紛,甚至遺產訴訟,案件種類之多真係不能盡錄。每件案件總有原告同被告。原告總係話自己啱,而被告亦話自己無錯唔應該由佢負責,唔係咁,d律師邊度有生意做。

生意人,最怕就係打官司, 法律費用高不特止,仲要花精神,花時間去準備,冇乜必要,其實都冇人想走入法庭。但係有時擺明自己老老實實做生意,就係唔好彩,撞正 蠻不講理嘅對 手,唔俾錢,唔找數,扣數,拖數,總之一樣米養百樣人,乜嘢款式都有。

不過最恐怖嘅都係見到嗰啲 爭人錢唔找數,但係又大聲過人嗰啲惡人。正所謂『惡人先告狀』,其實久不久我哋就喺法庭見到一兩個。呢啲人通常都有呢幾個特質: 爭人錢唔還,仲大聲過人; 冇嘢搵嘢嚟挑剔; 鍾意搵律師出信‘兇’人; 最極品嗰啲,就係有理冇理都好自己入稟法院告你先,仲要話係你違約問你攞賠償添;

真係見過有唔少客戶真係細 膽啲都俾對方嚇死,介以為自己有乜嘢欠左佢。

就好似男神黃子華話齋,香港人真係好燥,個社會好似好接受『恃惡行兇』,『惡』真係可以解決好多問題架。你欠人錢唔還,你惡過佢,可以唔 使還。你違反合約在先,你先告佢,有機會佢賠番俾你。真係細有細惡,大有大惡。官司打得多,自然見過好多本地同海外嘅大集團,惡起上來,又有錢,又有兵,明明佢欠你錢,你問佢追,但到最後 可能你仲驚過佢。

打官司其實係一場好複雜嘅球賽,比賽規則複雜到暈,唔係一般市民可以明白。如果冇一個熟透賽例嚟嘅律師從旁協助,有可能你都未埋到龍門口,已經被紅牌離場。惡人通常都有個 共同點,佢哋淨係得個『惡』字,一味靠狡辯,其實好多時都係冇理由,冇案情,冇證據,冇證人,正一『百冇』。其實只要據理力爭,做足 功課,真係又唔使咁快投降嘅。

翟律師 - 香港律師一名,日常主要處理各類型民事案件,商業購併項目,工作超過16年。閑時喜愛攝影,跑 跑山,跑跑沙漠,做義工,探公公 婆婆,為有需要嘅小朋友開party,為社會出一分 力。